„მარნეულის“ წითელ ტყემალში არასაკვები საღებავების აღმოჩენის გამო კომპანიამ ნიმუშები გერმანიის ლაბორატორიაში გადააგზავნა
„მარნეულის“ წითელ ტყემალში არასაკვები საღებავების აღმოჩენის გამო კომპანიამ ნიმუშები გერმანიის ლაბორატორიაში გადააგზავნა.
ამის შესახებ ინფორმაციას მარნეულის სასურსათო ქარხანა ავრცელებს.
„ბიზნესპრესნიუსი“ მათ განცხადებას უცვლელად გთავაზობთ:
„მარნეულის სასურსათო ქარხანამ თავისი წარმოების ტრადიციული წითელი ტყემალი შემოწმებისთვის გერმანიის ფრეზენიუსის ინსტიტუტის ლაბორატორიაში (SGS Institut Fresenius -https://www.institut-fresenius.de/en/) გააგზავნა.
ამასთან, მარნეულის სასურსათო ქარხანამ სურსათის ეროვნულ სააგენტოს მიმართა, იმისათვის, რომ მათი ზედამხედველობით ტრადიციული წითელი ტყემლის ნიმუშების აღება და დალუქვა მომხდარიყო.
კომპანიამ სხვადასხვა თარიღით წარმოებული პარტიებიდან სურსათის ეროვნული სააგენტოს მიერ დალუქული ნიმუშები დღეს გერმანიის ლაბორატორიაში გააგზავნა. გაგზავნილია სურსათის ეროვნული სააგენტოს მიერ წარმოების სხვადასხვა პარტიებიდან შემთხვევის პრინციპით შერჩეული და დალუქული რამდენიმე ბოთლი, ასევე შემოწმებას გაივლის წარმოებაში გამოყენებული დაღერღილი და დაფქვილი წიწაკა. რამდენიმე დალუქული ნიმუში გადამოწმებისთვის სურსათის ეროვნულმა სააგენტომაც წაიღო.
ფრეზენიუსის ინსტიტუტის ლაბორატორია (SGS Institut Fresenius) გერმანიაში მდებარეობს და 155 წლიანი გამოცდილება აქვს. ლაბორატორია სანდო პარტნიორია მომხმარებლებისთვის და მწარმოებლებისთვის როგორც გერმანიაში, ასევე მსოფლიოს სხვა ქვეყნებშიც. ლაბორატორია კვლევებისა და ანალიზების სფეროში დიდი ავტორიტეტით სარგებლობს და ამ მიმართულებით ერთ-ერთი საუკეთესოა მსოფლიოში. კომპანია ანალიზების პასუხს მიღებისთანავე აცნობებს საზოგადოებას. შეგახსენებთ, რომ ლაბორატორიის პასუხებამდე კომპანიამ დროებით შეაჩერა აღნიშნული პროდუქტის რეალიზაცია.
კომპანია მიესალმება ქართულ ბაზარზე საკვებ ინდუსტრიაში ხარისხის, პროდუქციისა და ნედლეულის წარმომავლობის გამჭვირვალე პროცესებს და იმედს იტოვებს, რომ ამგვარი კვლევები იქნება სისტემატური და არ ექნება პიარული ხასიათის,“-აღნიშნულია განცხადებაში.
შეგახსენებთ, რომ საქართველოს “სტატეგიული კვლევებისა და განვითარების ცენტრის“ მიერ ჩატარებული შემოწმების შედეგად, 42 დასახელების პროდუქტიდან 6-ში არასაკვები საღებავი აღმოჩნდა.
გთავაზობთ იმ პროდუქტების ჩამონათვალს, სადაც არასაკვები საღებავი აღმოჩნდა:
შპს „გსქ კულა“ -ტყემალი წითელი, კლასიკური;შპს მარნეულის სასურსათო ქარხანა - ტრადიციული წითელი ტყემალი;შპს „ფუდსერვისი“ ტომატის საწებელი Supremo;შპს „ეს“ - ეს აჯიკა;შპს Soledo - ჩილი სოუსი ცხარე;თეთნულდი - მშრალი აჯიკა
