დიდ ბრიტანეთში ჩატარებული გამოკითხვის მიხედვით 100 ყველაზე ცნობილ ბრენდს შორის Ryanair ბოლო ადგილზეა

დიდ ბრიტანეთში ჩატარებული გამოკითხვის მიხედვით, 100 ყველაზე ცნობილ ბრენდს შორის Ryanair ბოლო ადგილზე გავიდა. ამ ინფორმაციას BBC ავრცელებს.

გამოკითხვაში 4 000-მა ადამიანმა მიიღო მონაწილეობა. ცნობილ ბრენდებს შორის მათ უნდა აერჩიათ კომპანიები, რომლითაც ყველაზე მეტად არიან კმაყოფილი. გამოკითხვის მიხედვით, ცნობილი ირლანდიური დაბალბიუჯეტიანი ავიაკომპანია Ryanair ბოლო, მე-100 ადგილზე გავიდა.

აღსანიშნავია, რომ მსგავსი ტენდენტია უკვე მე-6 წელია ფიქსირდება და Ryanair ყოველთვის რეიტინგის ერთ-ერთ ბოლო ადგილს იკავებს.

გამოკითხულთა 45% აცხადებს, რომ კომპანიის მომსახურებით უკმაყოფილოა და Ryanair-ს ახასიათებს, როგორც „ხარბსა“ და „ქედმაღალს“.

გამოკითხულები ძირითადად უკმაყოფილებას მომსახურების ხარისხსა და პერსონალის არაკვალიფიციურობასთან დაკავშირებით გამოთქვამენ. ამასთანავე, ისინი უკმაყოფილოები არიან ავიარეისების ხშირი გადადებითა და გაუქმებითაც.

გამოკითხვაში წარმოდგენილი იყო 2 ბრიტანული ავიაკომპანიაც, რომლებიც რესპოდენტებმა ასევე ნეგატიურად შეაფასეს. ასეულში British Airways-მა 83-ე ადგილი დაიკავა, ხოლო EasyJet-მა - 79-ე.

მოამზადა ბექა ბერიაშვილმა