ავიაკომპანია "Flynas" ბათუმის მიმართულებით ფრენებს სექტემბრის ბოლომდე გააგრძელებს

საუდის არაბეთის სამეფოს დაბალბიუჯეტიანი ავიაკომპანია "Flynas"-ი, რომელიც საქართველოს საავიაციო ბაზარზე გასულ წელს შემოვიდა, რიადი-ბათუმი-რიადის მიმართულებით ოპერირებას სექტემბრის ბოლომდე გააგრძელებს. ამის შესახებ ინფორმაციას სამოქალაქო ავიაციის სააგენტო ავრცელებს.

მათივე ცნობით, ავიაკომპანია აღნიშნულ მიმართულებაზე რეგულარული რეისებს 2019 წლის 2 ივნისიდან 31 აგვისტომდე ასრულებდა, ხოლო განახლებული განრიგის შესაბამისად, ფრენები რიადი-ბათუმი-რიადის საჰაერო ხაზზე 30 სექტემბრამდე გაგრძელდება.

"ავიარეისები დღეიდან, კვირაში 3 სიხშირით (ოთხშაბათი, პარასკევი, კვირა) Airbus A319 და A320 ტიპის საჰაერო ხომალდებით შესრულდება. საქართველოს ეკონომიკისა და მდრგადი განვითარების სამინისტროს სამოქალაქო ავიაციის სააგენტოს მიერ, "Flynas"-ს საჰაერო მიმოსვლის განხორციელებისათვის აუცილებელი ნებართვა 2019 წლის 3 სექტემბერს მიენიჭა",- ნათქვამია სამოქალაქო ავიაციის სააგენტოს განცხადებაში.