თბილისში ოთხ ლოკაციაზე აღებულ სინჯებში ტყვიის შემცველობა დასაშვებ ნორმას არ აღემატებოდა

გარემოს ეროვნული სააგენტოს ინფორმაციით, თბილისსა და რუსთავში სხვადასხვა ლოკაციაზე პერიოდულად ოზონის მომატებული მნიშვნელობები ფიქსირდება.

გარემოს ეროვნული სააგენტოს ცნობით, თბილისში ატმოსფერულ ჰაერში ტყვიის შემცველობის დასადგენად, გასულ კვირას ჰაერის სინჯები აიღეს ქალაქის ოთხ ლოკაციაზე - ფალიაშვილის ქ.N29, საბავშვო ბაღი „ფიფქია“; ონიაშვილის ქ,N68, საბავშვო ბაღი „მაცაცელა“; ონიაშვილის ქ.N29, საბავშვო ბაღი „ჩვენი ეზო“; ნუცუბიძის ქ.N155, საბავშვო ბაღი „სნუპი“.

მათივე ინფორმაციით, ლაბორატორიული კვლევის შედეგად დადგინდა, რომ თბილისში ოთხივე ლოკაციაზე აღებულ სინჯებში ტყვიის შემცველობა დასაშვებ ნორმას არ აღემატებოდა.

„გარემოს ეროვნული სააგენტო ატმოსფერულ ჰაერში ტყვიის შემცველობის განსაზღვრას აგრძელებს. საქართველოს გარემოს დაცვისა და სოფლის მეურნეობის სამინისტროს სსიპ გარემოს ეროვნული სააგენტო აგრძელებს ატმოსფერული ჰაერის ხარისხის უწყვეტ მონიტორინგს ავტომატური სადგურების საშუალებით. თბილისში, ბათუმში, რუსთავსა და ქუთაისში ისაზღვრება ძირითადი დამაბინძურებელი ნივთიერებების კონცენტრაციები. გაზომვების შედეგად ატმოსფერულ ჰაერში განსაზღვრული ნივთიერებების შემცველობები ნორმის ფარგლებში დაფიქსირდა, გარდა აზოტის დიოქსიდის (NO2) და მყარი ნაწილაკების (PM10) კონცენტრაციებისა. ასევე თბილისში „ილიას ბაღში“ პერიოდულად ფიქსირდებოდა ოზონის მომატებული მნიშვნელობები; 11 სექტემბერს მყარი ნაწილაკების PM10-ის კონცენტრაციების ნორმაზე გადაჭარბება დაფიქსირდა მხოლოდ თბილისში წერეთლის გამზირზე 1.1-ჯერ, 12 სექტემბერს - წერეთლის გამზირზე 1.1-ჯერ, ხოლო რუსთავში - 1.2-ჯერ, 13, 15 და 16 სექტემბერს მხოლოდ რუსთავში: 13 სექტემბერს - 1.1-ჯერ, 15 სექტემბერს-უმნიშვნელოდ, ხოლო 16 სექტემბერს - 1.3-ჯერ. 10 და14 სექტემბერს PM10-ის კონცენტრაციების ნორმაზე გადაჭარბება არ დაფიქსირებულა. ამ დღეების განმავლობაში მყარი ნაწილაკების PM10-ის კონცენტრაციების საშუალო წლიურ ნორმაზე გადაჭარბება დაფიქსირდა ქ.თბილისში წერეთლის გამზირსა და ქუთაისში 1.2-ჯერ. ასევე ფიქსირდებოდა აზოტის დიოქსიდის კონცენტრაციების საშუალოწლიურ ნორმაზე გადაჭარბება ქალაქ თბილისში წერეთლის გამზირზე 1.2-ჯერ, ხოლო ქ.ბათუმში აბუსერიძის ქუჩაზე 1.4-ჯერ“, - აღნიშნულია გარემოს ეროვნული სააგენტოს მიერ გამოქვეყნებულ ინფორმაციაში.

უწყების ცნობით, ყოველკვირეულად ინფორმაცია გასული კვირის განმავლობაში საქართველოს ტერიტორიაზე ატმოსფერული ჰაერის ხარისხის მდგომარეობის შესახებ ქვეყნდება გარემოს ეროვნული სააგენტოს ვებ-გვედზე nea.gov.ge, ხოლო ყოველდღიური მონაცემების ნახვა შესაძლებელია ატმოსფერული ჰაერის ხარისხის პორტალზე air.gov.ge.