"ამერიკის სავაჭრო პალატა ყველაფერს გააკეთებს, რომ საქართველოსა და ამერიკას შორის პირდაპირი ფრენების შესახებ ინიციატივა რეალობად იქცეს"

ამერიკის სავაჭრო პალატის პრეზიდენტის, მაიკლ ქოუგილის თქმით, ამერიკის სავაჭრო პალატა საქართველოში, ყველაფერს გააკეთებს, რომ საქართველოსა და ამერიკას შორის პირდაპირი ფრენების შესახებ ინიციატივა რეალობად იქცეს.

ქოუგილის შეფასებით, საქართველოსა და აშშ-ს შორის პირდაპირი ფრენების დაწყება ორ ქვეყანას შორის ბიზნეს ურთიერთობებს გააღრმავებს. მისი თქმით, მოხარულია ეკონომიკის მინისტრის მიერ ორ ამერიკულ კომპანიასთა გამართული შეხვედრების გამო.

„მოხარულები ვართ იმ შეხვედრების გამო, რომლებიც მინისტრმა თურნავამ გამართა გასულ კვირას United Airlines-სთან და Delta Airlines-სთან. ეს ძალიან მნიშვნელოვანია ეკონომიკური თვალსაზრისით, ვინაიდან ავიაკომპანიები ნახავენ მოგებას, გაიზრდება ბიზნეს მიმოსვლა და, შესაძლოა, ორ ქვეყანას შორის გამარტივებული და გაღრმავებული ბიზნეს ურთიერთობები იქცეს თავისუფალი ვაჭრობის შესახებ შეთანხმებაზე მოლაპარაკებების უფრო წარმატებით და დროულად დასრულების საწინდარი.

ამასთან, ბევრი სახელმწიფო მოხელეა, რომელსაც ხშირად უწევს ამერიკასა და რეგიონს შორის მოგზაურობა და საქართველო არის ერთგვარი ჰაბია ამ რეგიონში თავისი ”ღია ცის” პოლიტიკით, რომელსაც შეუძლია მოიზიდოს მეტი მოგზაური სხვადასხვა რეგიონიდან, რადგან მათ შეეძლებათ აშშ-ში წასვლა პირდაპირი რეისით. ეს არის ის, რასაც ჩვენ დიდი ხანია გვსურს და ასევე ხელს ვუწყობთ ამ საქმეს იმ პოლიტიკოსებთან საუბრისას, რომლებიც ჩამოდიან საქართველოში ვიზიტით და მათთან, ვისაც ვაშინგტონში ვხვდებით. ასე რომ, ჩვენ აღსავსენი ვართ ენთუზიაზმით და მინისტრმა თურნავამ იცის, რომ ჩვენ, ამერიკის სავაჭრო პალატა საქართველოში, ყველაფერს გავაკეთებთ იმისათვის, რომ ეს ინიციატივა რეალობად იქცეს,”-აცხადებს ქოუგილი.

მისივე განცხადებით, პირდაპირი რეისების დანიშვნა საქართველოში მეტი ინვესტიციის შემოსვლას შეუწყობს ხელს და ასევე წაახალისებს ტურიზმს.

„კიდევ ერთი რამ, რაც უნდა დავინახოთ, არის ის, რომ ყოველწლიურად საქართველოსა და აშშ-ს შორის მიმოსვლა, დაახლოებით, 25%-ით იზრდება და არიან ინვესტორები, რომლებიც პირდაპირი რეისების არარსებობას საქართველოში ბიზნესის დაწყების შემაფერხებელ ფაქტორად მიიჩნევენ, პირდაპირი რეისების დანიშვნა ინვესტორებს ბიზნესის დაწყებას გაუმარტივებს. ასე რომ, ჩვენ ვიცით, რომ ამ ინიციატივის განხორციელება ხელს შეუწყობს ბიზნესს, მეტ ინვესტიციებს შემოიტანს და დაეხმარება ტურიზმს, როგორც ამერიკაში, ასევე საქართველოში,“ - აღნიშნა მაიკლ ქოუგილმა.