„ჯორჯიან მანგანეზის“ დაფინანსებით ჭიათურაში ამბულატორია აშენდება

„ჯორჯიან მანგანეზის“ ინიციატივითა და დაფინანსებით ჭიათურაში ამბულატორია აშენდება.

ამის შესახებ კომპანია „ჯორჯიან მანგანეზიდან“ იუწყებიან.

მათი ინფორმაციით, ახალი სამედიცინო დაწესებულება ქალაქში არსებულ ძველ ამბულატორიას ჩაანაცვლებს, რომელიც ახალ ლოკაციაზე გაუმჯობესებული სახითა და განახლებული სერვისებით იქნება წარმოდგენილი.

კერძოდ, დაწესებულებაში ოჯახის ექიმის კაბინეტები განთავსდება, სადაც პაციენტებს შესაძლებლობა ექნებათ, მიიღონ შემდეგი მომსახურება: ლაბორატორია (ღრმა კვლევების გარეშე); ექოსკოპია; პორტატული რენტგენი; კარდიოგრაფისა და ოჯახის ექიმის მომსახურება.

„აღნიშნული გადაწყვეტილება ჩვენი კომპანიისთვის სოციალური პასუხისმგებლობის პროექტია, რაც მოქალაქეებს შესაძლებლობას მისცემს, ხელმისაწვდომი სამედიცინო მომსახურებით ისარგებლონ.„ჯორჯიან მანგანეზი“ ადგილობრივი მოსახლეობის საჭიროებებს სისტემატურად სწავლობს. დღეს ხელმისაწვდომი ჯანდაცვა ყველა რეგიონისთვის ერთ-ერთი პრიორიტეტული მიმართულებაა, მათ შორის ჭიათურისთვის. მივიჩნიეთ, რომ მსგავსი დაწესებულების არსებობა, ქალაქისთვის და ჩვენი თანამშრომლებისთვის ძალიან მნიშვნელოვანი იქნებოდა“, - განაცხადა „ჯორჯიან მანგანეზის“ ადმინისტრაციულმა დირექტორმა თემურ ხონელიამ.

„ამ ეტაპზე ოთახების გადატიხვრის, კედლების გალესვის, სანტექნიკის მონტაჟის სამუშაოები, ასევე, ოჯახის ექიმებისთვის განკუთვნილი კაბინეტების მოწყობა მიმდინარეობს, რათა სამედიცინო პერსონალის ყველა კაბინეტი თანამედროვე სტანდარტების შესაბამისად გაიმართოს.

სამშენებლო-სარემონტო სამუშაოებს „ჯორჯიან მანგანეზში“ დასაქმებული პირები ასრულებენ, საჭირო მასალების შეძენაც კომპანიამ უზრუნველყო“, - ნათქვამია ინფორმაციაში.