რა ქონებას ფლობს ბიძინა ივანიშვილი, რომელიც წყალტუბოს აღორძინებას გეგმავს
ყოფილი პრემიერი, "ქართული ოცნების" ლიდერი ბიძინა ივანიშვილი ქალაქ წყალტუბოს აღორძინებას გეგმავს.
ის საკუთარი სახსრებით "მაქსიმალურად შემჭიდროვებულ ვადებში" გეგმავს ამორტიზებული ტურისტული და სამკურნალო ინფრასტრუქტურის სრულმასშტაბიან რეაბილიტაციას. ამასთან, ივანიშვილის თქმით, „გადაწყვიტა, გამოისყიდოს უკლებლივ ყველა, 22 სასტუმრო, 9 აბანო და მოახდინოს მათი სრული რეაბილიტაცია".
Bloomberg-ის მიხედვით, ბიძინა ივანიშვილის ქონება ბოლო ერთ კვირაში 20 მილიონი დოლარით გაიზარდა.
რეიტინგში ბიძინა ივანიშვილი 29 ოქტომბრის მდგომარეობით 355-ე პოზიციაზე იმყოფება. ინდექსის მიხედვით, ბიძინა ივანიშვილის ქონება 5.37 მლრდ დოლარს შეადგენს, მაშინ როდესაც 22 ოქტომბრის მდგომარეობით მისი ქონება 5.35 მლრდ დოლარი იყო.
5.30 მლრდ დოლარად ბიძინა ივანიშვილს შეუძლია შეიძინოს 4.35 მილიონი უნცია ოქრო და 101 მილიონი ბარელი ნავთობი. მისი ქონება უტოლდება შეერთებული შტატების მშპ-ს 0.0298%-ს, შეერთებულ შტატებში „ტოპ“ 200 აღმასრულებელი დირექტორისთვის მიცემული კომპენსაციის 85%-ს, შეერთებული შტატების „ტოპ“ 100 კოლეჯის შემოწირულობის 1.36%-ს.
აღსანიშნავია, რომ მილიარდერების ინდექსის თანახმად, ივანიშვილის ქონება ყველაზე მაღალი - 2013 წელს იყო, როცა 6.40 მლრდ აშშ დოლარს შეადგენდა.
გამოცემას ბიზნესმენთან დაკავშირებით მცირე ინფორმაციაც აქვს დატანილი, სადაც ივანიშვილის ბიზნეს საქმიანობის დაწყებისა და პოლიტიკური კარიერის მოკლე ისტორიაა ასახული.
„ივანიშვილმა კარიერა პოსტ-საბჭოთა რუსეთში 1990-იან წლებში რკინის მადნის მოპოვებაში, ბანკებსა და უძრავ ქონებაში ფულის ჩადებით დაიწყო. თავისი აქტივების უმეტესობა 2003-2006 წლებში გაყიდა, დანარჩენი ნაწილი გაიყიდა საქართველოში პრემიერ-მინისტრად არჩევამდე 2012 წელს. ერთი წლის შემდეგ კი ის თანამდებობიდან გადადგა,“ - იუწყება გამოცემა.
ცნობისთვის, Bloomberg-ის მილიარდერების ინდექსი მსოფლიოს ყველაზე მდიდარი ადამიანების ყოველდღიური რეიტინგია. ცნობითვის, Bloomberg-ის მილიარდერთა სიაში სულ 500 მილიარდერია. მილიარდერთა რეიტინგში საქართველოდან მხოლოდ ბიძინა ივანიშვილია წარმოდგენილი.
