საპარტნიორო ფონდის მენეჯმენტმა ლიკანში ხუთ ვარსკვლავიანი სასტუმრო კომპლექსის სამშენებლო სამუშაოები ყაზახურ დელეგაციასთან ერთად დაათვალიერა.
საპარტნიორო ფონდის ინფორმაციით, ლიკანში მიმდინარე სამუშაოები საქართველოში ვიზიტით მყოფმა ყაზახური კომპანია "ყაზმუნაიგაზ-სერვისის" დირექტორმა, ბატირბეკ ბაშეევმა საპარტნიორო ფონდის მენეჯმენტთან ერთად დაათვალიერა. საპარტნიორო ფონდის აღმასრულებელმა დირექტორმა ირაკლი კოვზანაძემ აღნიშნა, რომ სამუშაოები ინტენსიურ რეჟიმში მიმდინარეობს.
ხუთ ვარსკვლავიანი სასტუმრო კომპლექსი, რომელსაც საპარტნიორო ფონდი და ყაზახური კომპანია "ყაზმუნაიგაზ-სერვისი" ერთობლივად ახორციელებენ, ლიკანში (ბორჯომი) ყოფილი IV სამმართველოს ტერიტორიაზე შენდება. 152 ნომრიანი სასტუმრო დასვენებისთვის აუცილებელი თანამედროვე ინფრასტრუქტურით იქნება აღჭურვილი. კომპლექსში შესაძლებელი იქნება სამკურნალო-გამაჯანსაღებელი პროცედურების ჩატარება. პროექტი ასევე სასტუმროს მიმდებარე ტერიტორიის - გზების, პარკინგის, გასართობი ცენტრის და კომპლექსის სხვა დამხმარე ნაგებობების რეაბილიტაციასაც ითვალისწინებს.
როგორც საპარტნიორო ფონდში აცხადებენ, კომპლექსის მთლიანი საინვესტიციო მოცულობა 38,5 მლნ აშშ დოლარია. ფონდის თანამონაწილეობა პროექტში კაპიტალის 50%-ია. სასტუმროს თანამედროვე ტექნიკით, ავეჯით და სხვა აუცილებელი ელემენტებით აღჭურვაზე მუშაობს თურქული კომპანია "დეკონი", ხოლო ოპერირებას მსოფლიოში ცნობილი ოპერატორი RIXOS განახორციელებს.