დიდი ბრიტანეთი ფუნტის ციფრულ ვერსიას გამოუშვებს
დიდი ბრიტანეთი რამდენიმე წელში ფუნტის ციფრულ ვერსიას გამოუშვებს, რათა ფულადი გზავნილების ხარჯები შეამციროს. ამის შესახებ NatWest ბანკის ხელმძღვანელმა, ჰოვარდ დევისმა სააგენტო Reuters-ს განუცხადა.
სააგენტოს შეფასებით, ცენტრალური ბანკები მთელ მსოფლიოში ჯერ კიდევ სწავლობენ, გამოუშვან თუ არა მათი ვალუტის ციფრული ვერსია - CBDC (central bank digital currency), რათა გადახდის სისტემების სწრაფ ტექნოლოგიურ განვითარებას ფეხი აუწყონ და არ ჩამორჩნენ. ასეა The Bank of England-იც, რომელსაც ჯერ არ გადაუწყვეტია, დაიწყოს თუ არა CBDC-ის განვითარება.
„მე ეჭვი მაქვს, რომ 3-დან 5 წელიწადში ციფრული ფუნტი გაერთიანებულ სამეფოში საპილოტე ვერსიით ფუნქციონირებას დაიწყებს“, - აცხადებს ჰოვარდ დევისი.
მისი თქმით, CBDC ლოგიკური განვითარების პროდუქტია, თუმცა საბანკო თვალსაზრისით პრობლემატურია, რადგან ნაღდი ფული ეკონომიკიდან ნელ-ნელა გაედინება. ბანკის მმართველი, ასევე, აცხადებს, რომ კრიპტო-აქტივები, როგორიცაა, მაგალითად, ბიტკოინი, ეკოლოგიურადაც დამღუპველია და ტრანზაქციებისთვისაც უვარგისია, ხოლო კრიპტო-ტრანზაქცია „ბნელ ქსელში კოკაინის შესაძენად თუ გამოდგება.“
„ეს არ არის დაგროვებითი საშუალება და მეტად არასტაბილურია“ - აცხადებს დევისი.
The Bank of England-ის მმართველი, ენდრიუ ბეილი ამბობს, რომ დიდი ბრიტანეთი CBDC-ის განვითარების პროეცესს არ ჩამორჩება.
„უბრალოდ, ზუსტად უნდა ვიცოდეთ, თუ რას შეცვლის ციფრული ვალუტა და როგორ გააუმჯობესებს საგადასახადო სისტემას“, - აცხადებს დიდი ბრიტანეთის მთავარი ბანკირი.
ევროპის ცენტრალურმა ბანკმა უკვე მიიღო გადაწყვეტილება, გააგრძელოს ციფრული ევროს შემუშავება, თუმცა მის ფაქტიურ გამოშვებას, Reuters-ის შეფასებით, შესაძლოა, 5 წელი დასჭირდეს. გერმანული ბუნდესბანკის პრეზიდენტი, იენს ვეიდმანი აცხადებს, რომ ციფრულ ევროს თავიდან შეზღუდული ფუნქცია უნდა ჰქონდეს, რადგან მან შესაძლოა, საბანკო სექტორი შეაფერხოს და ცენტრალური ბანკის როლი ზედმეტად გაზარდოს.
მოამზადა ლადო სულაბერიძემ