მერია ღონისძიების „დააგემოვნე თბილისის ქუჩებში“ გამართვას გეგმავს

მერია ღონისძიებას „დააგემოვნე თბილისის ქუჩებში“ გამართვას გეგმავს. პროექტის ორგანიზების მომსახურების შესყიდვის მიზნით ტენდერი უკვე გამოცხადებულია.

სატენდერო პირობების თანახმად, წინადადადებების მიღება 30 ივნისს დაიწყება და 3 ივლისს დასრულდება. შესყიდვის სავარაუდო ღირებულება კი 87 050 ლარია.

როგორც სატენდერო დოკუმენტაციაშია აღნიშნული, პროექტის მიზანი კერძებისა და სასმელების მწარმოებელი ადგილობრივი მეწარმეების/ფიზიკური პირების ხელშეწყობა და მათი პროდუქციის პოპულარიზაციაა.

„ქალაქ თბილისის მუნიციპალიტეტის მერია ადგილობრივი კერძების და სასმელების მწარმოებელი დამწყები მეწარმეების/ფიზიკური პირების ხელშეწყობის მიზნით გეგმავს „თბილისური ბაზრის“ მორიგი სერიის - „დააგემოვნე თბილისის ქუჩებში“/„Tbilisi Street Food Park” ორგანიზების მომსახურების შესყიდვის განხორციელებას. ღონისძიება ხელს შეუწყობს კვების ინდუსტრიის და დამწყები მეწარმეების/ფიზიკური პირების წარმოების განვითარებას. ღონისძიება დაკომპლექტებული იქნება დამწყები კვების სტარტაპებით. ღონისძიების ფარგლებში, მეწარმეების/ფიზიკური პირების ხელშეწყობასთან ერთად, შეიქმნება სოციალური სივრცე მეგობრული შეკრებებისთვის, ოჯახებისთვის და ტურისტებისთვის.

ყოველ გამოფენა-გაყიდვაში მონაწილეობა უნდა მიიღოს არანაკლებ 85-მა მონაწილემ, მათ შორის: არანაკლებ 12-მა დამწყებმა სწრაფი კვების ობიექტმა; 60-მა სურსათის და ხელნაკეთი ნივთების მწარმოებელმა; 10-მა ღვინის და 3-მა ლუდის მწარმოებელმა,“-აღნიშნულია სატენდერო დოკუმენტაციაში.